Ослободителна пресуда за Зоран Јованов таткото на Васил Јованов кој смртно ја прегази Фросина Кулакова пресуди Кривичниот суд. Таткото беше обвинет за „Загрозување на безбедноста на сообраќајот“ затоа што на синот две години му дозволувал без возачка да управува со автомобил иако знаел дека не смее. Дејствијата за кои е обвинет родителот не се кривично дело оценува кривичниот суд.
„Судот оцени дека кривична одговорност не може да се заснова врз самата околност што обвинетиот е сопственик на возилото и што неговиот полнолетен син управувал со тоа возило без возачка дозвола. Законодавецот ваквото однесување изречно го регулирал и санкционирал како прекршок во Законот за безбедност на сообраќајот на патиштата, а судот не може преку проширено толкување на кривичниот закон да создава нови облици на кривична одговорност кои законодавецот не ги предвидел“, соопштија од Кривичниот суд
Судијката Снежана Марковска која претходно му пресуди 12 години затвор на синот Васил Јованов во предметот за родителот оценува дека одговорноста за сообракајката е индивидуална, а возачот полнолетен. Бројот на прекршоците не може да создаде нов правен квалитет на дејствие доколку не се исполнети законските обележја на конкретното кривично дело.
„Непосреден извор на опасност и непосреден причинител на настанатата последица е полнолетниот возач како самостоен учесник во сообраќајот. Кривичното право почива врз начелото на лична и индивидуална одговорност, поради што последиците од самостојното постапување на едно полнолетно лице не можат автоматски да му се припишат на друго лице само поради роднинска врска или поради сопственост на возилото“, соопштија од Судот.
На Васил Јованов, Апелација му ја зголеми казната на 13 години затвор. Тој во јануари лани без возачка дозвола под дејство на алкохол и со поголема брзина поминувајќи на црвено светло на пешачки премин ја прегази Фросина Кулакова.
Елена Ивановска