Државниот завод за ревизија изврши проверки на финансиските извештаи и усогласеност на Акционерското друштво за приредување игри на среќа – Државна лотарија на Република Македонија за 2024 година при што утврдила дека финансиските извештаи не може да се сметаат за целосно веродостојни, а усогласеноста со законската регулатива и воспоставените политики е неповолна.
Ревизорите велат дека се констатирани сериозни неправилности, меѓу кои сомнежи за злоупотреба на готовински средства, неточно евидентирање на трансакции и материјални средства, неточности во даночните обврски, неправилности во јавните набавки и спонзорства, како и нефункционален систем на внатрешна ревизија и контроли.
Дел од препораките од претходни ревизии се делумно или не се спроведени, а постои ризик од технолошко застарување на набавената опрема и непокриеност на одредени финансиски ризици.
За надминување на констатираните состојби се дадени препораки до надлежните органи и раководството на Друштвото.
Одговорот на директорот на Државната лотарија по нацрт-извештајот е разгледан, при што дел од забелешките беа прифатени, дел делумно, а дел не беа прифатени поради недостиг на докази, стои во извештајот на ревизија.
Б.С.