Застреланиот странец кој синоќа беше погоден со пиштол во кафуле во центарот на Штип им подлегнал на повредите, потврди обвинителството кое го истражува убиството.
И напаѓачот и жртвата се странски државјани, а првично беше објавено дека станува збор за студенти од Турција.
-Јавен обвинител од Основното јавно обвинителство Штип ноќеска вршеше увид на локација во кафе бар каде едно лице беше лишено од живот со истрели од огнено оружје. Напаѓачот и жртвата се идентификувани и станува збор за странски државјани. Од лице место подигнати се чаури и други траги кои ќе бидат предмет на вештачење, а телото на починатиот е дадено за обдукција. Обезбедени се и прегледани снимки од видео надзор. Се преземаат и други дејствија за обезбедување докази, а увидните дејствија на локацијата ќе продолжат и денеска, соопштија од обвинителството.
Јавниот обвинител во текот на ноќта издаваше повеќе насоки и наредби за пронаоѓање на сторителот кој е во бегство.
Напаѓачот веднаш избегал од местото на настанот и со автомобил се упатил во правец на Скопје. Полициската потера тргнала по него, а биле организирани и полициски блокади на повеќе места.
На патарината кај Миладиновци, осомничениот успеал да ја пробие блокадата и да ја скрши наплатната рампа и продолжил да бега. Потерата продолжила по што осмничениот е фатен.
-Основното јавно обвинителство Штип е известено од МВР дека лицето по кое се трагаше во врска со вчерашниот оружен инцидент е уапсено. Пронајдено е и оружјето. Во текот на денот ќе следи постапка, соопштија од обвинителството.