Водата во Маркова Река достигна критично ниво и на неколку места на територијата кај Батинци се излеjа од коритото. Полицијата синоќа ги блокира патиштата кон скопските населби Драчево и Долно Лисиче.
Критична беше состојбата кај мостовите кои што ги поврзуваат овие места со Скопје, па пристапот до овие населени места, како и до Студеничани, Батинци, Зелениково и останатите во тој регион беше можен само преку Јурумлери.
Нема опасност за жителите од излевањето на Маркова река, а водостојот е вратен во коритото. Ова го соопшти дирекцијата за Заштита и спасување, од каде велат дека има материјална штета врз жители на Батинци.
Водата од Маркова Река во Батинци, поплави улици и подруми. Синоќа на терен излезе и Градоначалникот на Општина Кисела Вода, Орце Ѓорѓиевски. Тој информираше дека „механизацијата е на терен и нема опасност по населението, како и дека напорно се работи на враќање на реката во своето корито“. До ЦУК пристигнале пријави за поплавени објекти на единствениот број 112.
