Се вика Сагр и се грижи за безбедноста во сообраќајот. Ги предупредува учесниците во сообраќајот да не прават грешки , им укажува на сообраќајните правила и ги предупредува дека може да бидат казнети. Расположен е да одговара на прашања и тоа на два јазика англиски и арапски.
На Глобалниот медиа Конгрес за употребата на вештачката интелигенција и медиумите и годинава беше најинтересен штандот на полицијата. Необично кога станува збор за место каде има стотици изложувачи од светот на медиумите, но полицијата на Абу Даби е во чекор пред времето па употребата на вештачката интелигенција во нивните системи за сејф сити, препознавање на личности и други операции е на највисоко ниво.
За среќа Сагр не пишува казни но софтверот што го користи полицијата на Абу Даби е толку прецизен што доколку направите прекршок казната стасува веднаш на вашиот телефон преку СМС порака.
Вештачката интелигенција се користи сепак најмногу за предупредување возачите да не направат грешка, а сензорите ги фаќаат сите неправилности.
Таму поставените порти на автопатите не се за закачување на реклами туку за да се види како учесниците во сообраќајот се однесуваат на патот.
Камерите се поставени да се гледа и регистрацијата но со тоа се прави целосна проверка на автомобилот, дали е регистриран, дали нешто е менувано на него и се разбира како возачот го управува. И овде казната стасува веднаш за оние кои грешат.
Со користењето на овој систем прекршоците се преполовени во последните три години, а за полицијата на Абу Даби најважно е да се учи од грешките за да не се повторуваат.
Возачите знаат дека не можат да им избегаат на камерите па возат многу попретпазливо но и полицијата постојано врши едукација на учесниците во сообраќајот употребувајќи вештачка интелигенција.
Така роботот Сагр е само еден од многуте полицајци со вештачка интелигенција кои се користат во Емиратите.
Снежана Лупевска Созен