Костарика е дом на една од светските „сини зони“ каде луѓето живеат подолг и поздрав живот од просекот.
Мелиса Гузман, авторка на книгата „Живеење подолго, поздраво и посреќно: рецепти од Костарика“, сподели со читателите што се јаде во оваа централноамериканска земја и која е тајната на нивната долговечност.
За Костариканците, како што изјавила, тоа што го јадат е исто толку важно како и искуството во кујната и околу масата.
– Длабоко ја цениме заедницата што доаѓа со готвењето – вели Гузман, додавајќи дека како дете секогаш му помагала на семејството да подготвува оброци, а понекогаш и ги биралa состојките.
Најдобар начин да се опише кујната од Костарика е едноставен и свеж, вели Гузман, додавајќи дека нивната исхрана во голема мера се потпира на свеж зеленчук, овошје, житарки и мешунки.
Гравот и другите мешунки се одличен извор на протеини, влакна, сложени јаглехидрати, пробиотици, витамини и минерали. Тие се поврзани со намален ризик од хронични болести како што се срцеви заболувања и дијабетес. Најпопуларни се црниот и црвениот грав, кои обично се служат како дел од касада (традиционално јадење од ориз, грав, зеленчук и протеини) или како супа од грав и зеленчук. Наутот и леќата се популарни овде и може да се користат како замена за традиционалниот црн грав, според Гузман.