Кошаркарите на МЗТ Скопје ја совладаа Цибона со 87-74 во последното коло од регуларниот дел од сезоната во АБА-лигата и сега чекаат милост од Будуќност за да обезбедат бараж за опстанок. Македонскиот шампион утре ќе ја дознае својата судбина.
МЗТ лошо го отвори натпреварот и во првото полувреме постојано имаше негатива, за на паузата да замине со 41-53. Во третиот период следуваше експлозија на „металците“, кои во тие 10 минути го надиграа гостинот од Хрватска со 30-5 за да дојдат до предност од 13 разлика. Во последниот период само ја одржуваа разликата, а има и највисоки +17. Конечниот резултат гласеше 87-74, што беше трета победа по ред за скопскиот тим во АБА.
Мајк Кефи со 19 поени беше најефикасен во редовите на МЗТ, Александар Бурсач имаше 17, а 15 поени постигна Кеандре Кук, додека двоцифрен беше и Војдан Стојановски со 14 поени.
Судбината на МЗТ сега е во рацете на кошаркарите на Будуќност и Борац, кои утре го играат својот натпревар од последното коло. На нашиот тим му треба победа на фаворитот Будуќност, бидејќи во спротивно Борац би изборил бараж за опстанок, а МЗТ како последнопласиран тим би испаднал во АБА2.
