Руските власти отворија кривична истрага по исчезнувањето и наводното убиство на брачниот пар Роман и Ана Новак од Санкт Петербург, кои исчезнаа на почетокот на октомври во Обединетите Арапски Емирати (ОАЕ).
Според истражувањата, двојката била киднапирана за откуп, но била убиена откако сторителите не успеале да пристапат до нивните криптовалутни фондови.
Семејството на Новак пријавило дека контактот со двојката се прекинал по неколку дена без одговор. Нивниот приватен возач последен пат ги видел на 2 октомври, кога ги оставил во Хата, крајбрежна област близу границата со Оман, каде што требало да се сретнат со потенцијални инвеститори.
Според „Москва тајмс“, по префрлањето во друго возило, двојката повеќе не била видена. Истражниот медиум „Фонтанка“ објави дека Роман и Ана биле намамени во изнајмена вила под лажен изговор за инвестициски состанок. Сторителите ги нападнале откако не успеале да добијат пристап до нивните пари.
Распарчените останки на двојката наводно биле пронајдени на 3 октомври во емиратот Фуџаира. Иако рускиот канал РТ тврди дека телата сè уште не се лоцирани, изворите на „Фонтанка“ велат дека киднаперите ги оставиле останките во контејнери во близина на трговски центар во Хата.
Според „Фонтанка“, осум лица се осомничени за вмешаност – тројца директни извршители и пет посредници. Седуммина се уапсени во Русија. Четворица од посредниците најверојатно ќе бидат ослободени, бидејќи не биле запознаени со планот за убиство. Осомничените биле следени преку снимки од безбедносни камери и сигнали од мобилни телефони, кои последно биле лоцирани во Оман и Јужна Африка.
Кој бил Роман Новак?
Роман Александрович Новак, познат и како Јаворски или Царев, бил претприемач од Санкт Петербург со бурна историја во крипто-секторот. Тој стоел зад платформата Fintopio, за која се тврдеше дека е криптовалутен паричник и размена поврзана со екосистемот Telegram/TON.
Иако оваа врска никогаш не била официјално потврдена, токму таквите тврдења му помогнале да привлече големи инвестиции – наводно околу 500 милиони долари. Платформата подоцна престанала со работа, оставајќи бројни измамени инвеститори зад себе. Новак бил осуден во 2020 година во Русија за измама од големи размери. По условното ослободување, се преселил во ОАЕ, каде продолжил со крипто активности.
Руските истражни органи соопштија дека тесно соработуваат со властите на ОАЕ за целосно расветлување на случајот. Судот во Санкт Петербург треба да одлучи за мерките на претпазливост за уапсените. Случајот предизвика огромно внимание во Русија и регионот, поради комбинацијата од крипто-финансиски измами, меѓународно киднапирање и брутално убиство.
Т.Д.