Недостиг од термини за биопсија и патологија и упатување на пациентите најпрво на хирургија, наместо во координација со онколозите да се изготви план за понатамошно лекување – тоа се најголемите проблеми со кои се соочуваат заболените од рак на дојка во Македонија.
На ова предупредија од здружението ХЕМА-ОНКО, кои денеска на Клиниката за онкологија организираа заеднички појадок со онколошките пациенти и разговор за полесно надминување на тешкотиите во лекувањето, по повод розевиот месец посветен на борбата против рак на дојка.
- „70% од рано дијагностицираните пациенти своите испитувања ги прават приватно. Тоа сметам дека е пораз за здравствениот систем. Премногу долго се чека за термини за биопсија и патологија на државните институции“, изјави Ана Марјановиќ, здружение ХЕМА-ОНКО.
- „Ние ги разбираме пациентите. Прво е недоволно познавање на болеста и на протоколите. Затоа мислат дека ако го решат проблемот со операција толку е. Меѓутоа тоа не е така. Всушност тогаш почнува се, а особено лекувањето“, изјави Милица Кузмановска, здружение ХЕМА-ОНКО.
На настанот зборуваше и онколошката пациентка Тереза Балаловска, која шест години се лекува на Онкологија и денес е на биолошка терапија.
- „Моето патешествие овде низ лекувањето започна кон крајот на 2019 година. После хируршка интервенција се лекував на Онкологија. Поминав осум хемотерапии, па после тоа продолжена таблетарна терапија и сега сум добра“, раскажа Тереза Балаловска, онколошки пациент.
Здружението ХЕМА-ОНКО апелира на редовни превентивни прегледи, особено кај жените над 50 години. А исто така и предупредија дека многу важно е да се води здрав живот.
- „Една мамографија годишно или на две години мора да има. Треба да се смени начинот на размислување, а особено за оние жени над 55 години кои сметаат дека тоа не им треба“, порача Милица Пецова, здружение ХЕМА-ОНКО.
Само оваа година во земјава се регистрирани 1.200 нови пациенти со рак на дојка, а бројката расте од година во година.
Тамара Марковска
Дигитална обработка: Б.С.