Молдавската владеачка проевропска партија успеа да победи на парламентарните избори и покрај сериозната кампања за нивно попречување која ја спроведуваа проруски елементи во земјата. По обработени 99,9 проценти од гласовите, владејачката ПИС освои 50,2 проценти од гласовите, задржувајќи ја Молдавија надвор од руската орбита и на патот кон ЕУ.
Mолдавските власти ги означија овие избори како клучни за иднината на земјата, а како такви ги оцени и Русија. Кампањата беше обележана со бројни случаи на обиди за купување гласови, дезинформации и обвинувања за подготвување улично насилство по објавувањето на резултатите.
„Сите знаеме дека Руската Федерација беше длабоко вмешана во изборите во Република Молдавија. И јас и нашите институции зборувавме за мноштвото методи, почнувајќи од обиди за купување гласови, стотици милиони евра беа потрошени за ова. Зборував за обучувањето на млади луѓе од Република Молдавија да спроведуваат насилни и дестабилизирачки акти“, изјави Маја Санду, претседателка на Молдавија.
И покрај тоа, двете политички субјекта кои не постоеја на претходните избори, Патриотскиот изборен блок и партијата Алтернатива, благодарение на руското мешање успеаја да освојат една третина од гласовите.
Разлика на овие избори, идентично како и на претходните во 2021 година, на кои исто така победи партијата формирана од претседателката Санду, ја направија гласачите од дијаспората од кои најголемиот дел живеат во земји членки на ЕУ.
Дури и таму имаше обиди за нарушување. Дојави за подметнати бомби на кратко затворија неколку амбасади каде што се одвиваше гласањето, а властите идентификувале повеќе од 900 лажни налози на социјалните мрежи кои ширеле дезинформации.
Игор Трајков