Претседателот Володомир Зеленски рече дека Украина „значително ја ограничила руската нафтена индустрија“ по неодамнешниот напад врз земјата. Во видео обраќање , Зеленски рече дека „војната на Русија е во суштина функција на нафтата, на гасот, на сите нејзини други енергетски ресурси“.
„Најефикасните санкции – оние што дејствуваат најбрзо – се санкциите врз руските рафинерии за нафта, нејзините терминали, нафтени депоа“, додаде тој.
Руските власти и украинската војска изјавија вчера дека украински беспилотни летала погодиле една од најголемите руски рафинерии за нафта, предизвикувајќи пожар.
Нападот во текот на ноќта врз рафинеријата Кириши, во северозападниот регион Ленинград на Русија, следува по недели украински напади врз руската нафтена инфраструктура за кои Киев вели дека ги поттикнуваат воените напори на Москва.
Русија останува втор најголем извозник на нафта во светот, но сезонскиот пораст на побарувачката и континуираните напади со украински беспилотни летала предизвикаа недостиг на бензин во последните недели. Бензинските пумпи се испразнија во некои региони од земјата, при што возачите чекаат во долги редици, а службениците прибегнуваат кон рационализирање или целосно прекинување на продажбата.
Во обид да го ублажи недостигот, Русија го запре извозот на бензин, а официјалните лица во средата прогласија целосна забрана до 30 септември и делумна забрана што ги засега трговците и посредниците до 31 октомври.