Росица Кулакова, сестрата на Фросина, која беше усмртена од возачот Васил Јованов на пешачки премин, побара да се затворат таткото на возачот и судијката Даниела Алексовска-Стојаноска која во постапката за дрогата му одредила воспитна мерка, наместо затвор. Таа смета дека тие не можат да извршуваат државни функции.
-Општеството е огледало на вредностите што ги носат оние кои го водат, а децата се најчистиот одраз на своите родители. Не може да се очекува чесно и одговорно управување од луѓе кои не успеале да ги всадат основните морални и општествени вредности дури ни во сопствениот дом. Доделувањето на држвните фунцкии не смее да се сведе само на формални образовни критериуми, јавните функции мора да ги извршуваат луѓе со интегритет, кој својот карактер го покажале и во својот живот како граѓани, родители. Оној што не успеал да го воспита сопствениот наследник, да ги почитува законите, да разликува добро од зло и да живее чесно, не може да бара доверба да управува со државата. Ваквите лица не смеат да добијат јавна функција туку да одговараат за сопственото делување, но и за криминалните постапки на своите помлади полнолетници. Општеството не смее да биде заложник на луѓе без морални темели, наведе Росица Кулакова.
Сестрата на загинатата бара правда, но и одоворност за трагедијата која го погоди семејството Кулакови, но и целата јавност.
-Ние за Фросина бараме правда не само од убиецот, бараме правда и од таткото, бараме да одговара таткото, да се затвори таткото, Зоран Јованов и судијката, Даниела Алексовска-Стојаноска, кои не излегоа јавно да изразат сочувство кон семејството, туку се кријат и бришат профили, сподели Росица.
На крајот на своето обраќање, сестрата на Фросина Кулакова посака никој да не поминува низ она што го минува таа и семејството.