И покрај критиките за скромниот реформски напредок во првата половина од мандатот, актуелната влада и натаму ужива силен политички комодитет, оценува политичкиот аналитичар Иво Ранѓеловиќ во емисијата „Вин-Вин“ на Телма.
Според него, токму високата политичка поддршка и слабоста на опозицијата се клучните причини поради кои власта успева да ја одржи својата позиција без поголеми политички потреси.
„Има една работа која не оди во прилог да критикувам, а секогаш ми прави шах-мат, а тоа е комодитетот кој го ужива оваа влада. Што и да кажам и искритикувам, сепак тој комодитет е легитимен. Тоа е еден од темелите зошто оваа влада така се однесува“, изјави Ранѓеловиќ.
Тој смета дека дополнителен фактор е отсуството на силна и организирана опозиција која би можела поефикасно да ги артикулира критиките кон власта.
„Немаме некоја сериозна опозиција која сето ова може да го бутне како критика. Во општеството и понатаму е присутна перцепцијата дека претходната власт ја предала државата, дека го променила името и направила отстапки кои не требало да ги направи. Поради тоа, оваа допадливост и натаму се одржува како сигурна карта за останување на власт“, рече Ранѓеловиќ.
Сепак, аналитичарот предупредува дека вистинскиот предизвик за владата ќе дојде доколку се отвори прашањето за уставните измени и внесувањето на Бугарите во Уставот, или други чекори поврзани со евроинтегративниот процес, за кои ќе биде потребна поширока јавна поддршка.
Т.Д.