Двајца поранешни премиери на Грција, Костас Караманлис и Андонис Самарас, од редовите на „Нова демократија“, побараа заострување на надворешната политика на официјална Атина кон Македонија, но и кон Албанија и Турција.
Обараќајќи се синоќа на промоција на книга, двајцата не ја штедеа актуелната влада на Кирјакос Мицотакис по многу теми, а во контекст на надворешната политика побарале од Мицотакис создавање на силна правна и политичка група на експерти кои би подготвиле повлекување од, како што го нарекле, „национално опасниот договор од Преспа“. По примерот на Бугарија, тие побарале и ставање на вето на секој чекор за Скопје.
Самарас изјави дека Македонија од почетокот не го почитувала договорот од Преспа, како што не ја почитувала ниту времената спогодба на Андреас Папандреу. Самарас ја обвини претседателката на државата, Гордана Сиљановска Давкова за иредентистичка догма, поради средбата со претставници на децата бегалци од Егејска Македонија.
Караманлис, пак, бил на став дека е неопходно да се испрати гласна порака и до Скопје и до Тирана, дека нивниот пат кон ЕУ зависи од Грција. Караманлис беше премиер на Грција, кога Македонија го доби ветото од Грција за пристапување во НАТО во 2008 година. Самарас беше премиер на Грција од 2012 до 2015 година, а во 90-те години беше министер за надворешни на Грција, запаметен по многу тврдите позиции по спорот за името на Македонија.