Рано утрово со полициски хеликоптер на МВР на лекување во Виена е прфрлен младиот Леонид Индов кој има тешки повреди на рбетот добиени минатото лето во Грција.
Ова е прв меѓународен лет за медицински транспорт со полициски хеликоптер, соопштија од МВР.
По враќањето од болница во Солун, Леонид Индов беше згрижен во приватната болница Жан Митрев. Неговите најблиски се обидуваат преку хуманитарни акции да соберат доволно средства за поефикасно лекување на тинејџерот Индов.
За транспортот од клиниката беше ангажиран персонал од Градската Болница „8-ми септември“ кои претходно ги извршија неопходните медицински подготовки за летот кон Австрија.
Хеликоптерот беше подготвен за медицинскиот лет од страна на пилотите и персоналот на МВР… Летот на младиот Леонид кон Виена почна околу 6:30 часот рано наутро и тој веќе е префрлен во болница во Австрија.
На летот, присуствуваа лекарите Доц. Д-р Татјана Тројиќ спец. анестезиолог, Др. Јасмина Панова спец. анестезиолог, мед.сестра анестет. Марина Јанчева и Проф.Д-р Христијан Костов, директорот на градската болница.
-После интензивни договори, болницата набави и вгради најсовремена медицинска опрема за интензивна нега на пациенти во медикоптерот за итен медицински транспорт. Заедно со Министерството за внатрешни работи ја утврдивме медицинската и безбедносната маршута на движење на медикоптерот, со цел безбедно пристигнување на нашиот пациент во придружба на искусен медицински тим за интензивно лекување до Клиниката во Виена, рече директорот Костов.
На историскиот лет присуствуваа дополнителниот заменик министер за внатрешни работи Митко Бојмацалиев, директорот на Бирото за јавна безбедност Сашо Тасевски и началникот на Одделот за воздухопловни единици при МВР Ненад Алексовски.
-Упатувам честитки до нашите тимови за темелната подготовка и соработка помеѓу МВР и медицинскиот персонал од Градската Општа болница „8-ми Септември”, со што уште еднаш потврдуваме и ги засилуваме нашите капацитети како држава за брза реакција во итни медицински случаи. Дозволете во оваа прилика да изразам благодарност до сите учесници во овој успешен проект, особено до Владата на Република Словенија и словенечкото министерство за внатрешни работи кои во духот на нашето пријателство пред неколку месеци обезбедија дел од оваа значајна медицинска опрема, изјави Бојмацалиев.
