Турските власти побарале дополнителна документација по барањето за екстрадиција на Љупчо Палевски Палчо, осомничениот за убиството на Вања Ѓорчевка и Панче Жежовски. Од Министерството за правда информираат декана барањето веднаш било одговорено. Палевски ја напуштил државата на 30 ноември и преку Србија и Бугарија избега во Турција каде беше уапсен од тамошните власти во градот Баликесир.
Од Министерството за правда претходно посочија и дека ќе бидат потребни месеци за екстрадиција на Палевски, бидејќи тој може да се жали во текот на постапката. Засега во министерството немаат ништо ново околу текот на барањето за екстрадиција.
Лидерот на ВМРО – Народна партија, Љупчо Георгиевски во вечерашната Топ Тема во врска со Палевски рече дека треба да се провери зошто има пракса на негова неказнивост, иако тој има 6 кривични дела во изминатите 7,8 години.
„ДА СЕ НАПРАВИ КОМИСИЈА И ДА ВИДИМЕ ОД 1990 ГОДИНА КОЛКУ БИЛ ЗАШТИТЕН“, рече Георгиевски.
Максималниот период кој Палевски може да биде држен во притвор е една година. Извештајот од судска медицина за убиството на Вања се уште не е доставен до обвинителството. Извештајот од обдукцијата е еден од клучните докази во истрагата и целосно расветлување на случајот. Вања беше пронајдена мртва на 3 декември. И натаму останува отворено прашањето зошто Вања толку брзо е убиена, по два и пол часа од нејзиното грабнување на 27 ноември утрината. Јавното обвинителство е во фаза на прибирање на сите докази во случајот.
Марија Митевска