На претстојното Вонредно изборно собрание што ќе се одржи в сабота, членството на Друштвото на писатели на Македонија ќе избира претседател меѓу двајца кандидати, откако Гоце Ристовски на 13. ноември ја повлече кандидатураta, а Живко Грозданоски тоа го стори пред два дена.
Според Гоце Ристовски, разединетоста на членството е првата причина за повлекување на кандидатурата.
- Тоа за мене беше показ дека со промената на раководството нема да се постигне посакуваниот напредок и дека по мое видување тоа може да се случи само со промени во секој поединечен член на ДПМ, што сметам дека сега, а можеби и во скора иднина, нема да се случи, вели прозаистот и драмски писател, Гоце Ристовски.
А, Живко Грозданоски кој и лани се кандидира за претседател, но не успеа во тоа, вели дека се откажал, поради друг ангажман.
- Оваа година ќе бидам пред сè сосредоточен на еден личен ангажман во кој верувам, за кој пишувам, и кој веќе ги дава своите први плодови. Но, ќе се обидам на други начини да дадам придонес во книжевниот и во културниот живот, и ќе се трудам да го поддржувам Друштвото, вели писателот и книжевен критичар, Жарко Грозданоски.
Како кандидати за претседател на ДПМ сега остануваат Блаже Миневски и Мирче Нешовски. На Изборното собрание ќе се бира и претседател на Собранието, од кандидатите Иван Антоновски и Стефан Марковски, како и членови на Претседателството и на други тела на писателската асоцијација. Вонредното изборно собрание следува откако на почетокот на минатиот месец мнозинството членови од Претседателството на ДПМ поднесоа оставки , незадоволни од работењето на претседателот Христо Петрески, кој официјално се повлече од функцијата , по пиши- бриши оставките.
Сотир Трајков