Синоќа во Драмски театар беше изведена претставата „ Отело“, со што беа спуштени завесите на 16 издание на фестивалот на Регионалната унија на театари -РУТА. Покрај различните теми и режисерски пристапи, публиката низ шестте вечери сведочеше за разликите во квалитетот на претставите, кои се најавуваат како најрепрезентативни. Затоа од РУТА за в година најавуваат селекција.
Со изведбата на претставата „ Отело“, во копродукција на хрватскиот театар Улисис и Воениот театар „ САРТР“ од Сараево, синоќа во Драмскиот театар заврши 16 издание на Фестивалот на Регионалната унија на театри- РУТА. Беа прикажани вкупно 6 претстави , работени според класични и современи текстови, а настапија и градските театри од Љубљана и Подгорица, Народниот театар од Ниш, Камерниот театар 55 од Сараево, Белградскиот драмски и Драмскиот театар од Скопје. Покрај различните теми и режисерски пристапи, РУТА пониди увид и во разликите на квалитетот на остварувањата, велат критичарите.
- Ги гледавме сите претстави, видовме како реагира публиката. И на некои претстави беше очигледно дека на публиката не и е сосема јасно што се случува или зошто. Имаа коментари после тоа. Баш беа детални. А, имаше претстави кои функционираа супер, вели Јована Ѓорѓијовска, театарска критичарка.
Од 2019 година , кога започна , фестивалот РУТА се одржува како ревија на претстави, а изборот со што ќе се настапат, го прават театарите. Во насока на промоција на вистински најрепрезентативните остварувања, на состанокот меѓу членовите на РУТА одржан во Скопје, е договорено следното издание да остане ревијално, но сепак да има селекција.
- Се договоривме дека ќе бидеме во можност да ги погледнеме претставите кои што ни се нудат за гостување и согласно виденото, да се одлучи кој ќе биде гостин, вели Викторија Рангелова Петровска, в.д. директорка на Драмски театар.
Иако најавени, на фестивалот изостанаа тркалезните маси.
- Оваа година од различни причини, на барање на екипите не се одржуваа округлите маси. Но, од следната година , секако, вели в.д. директорката Рангелова Петровска.
Драмски го одржа фестивалот со 600 илјади денари буџет, што според в.д. директорката било прилично тешко. Но, таа е оптимист за следниве изданија, имајќи предвид дека министерството за култура инсистира на меѓународна соработка, која е вклучена и во Предлог – Националната стратегија за култура, за следниве 4 години. А, оптимизмот за квалитетниот театар го одбранија претставите „ Нора“ на ГТЉ, во режија на Нела Витошевиќ и „ Отело“ , во режија на Украинката, Оксана Дмитриева.
Сотир Трајков