Во рамките на фестивалот на Регионалната унија на театри- РУТА, вечерва во Драмски театар ќе настапи Камерниот театар 55 од Сараево, со претставата „Син“. Се работи за еден дел од трилогијата на современиот француски драматичар Флоријан Зелер. А, зборува за последиците кои врз младите генерации ги оставаат дисфункционалните семејства од кои потекнуваат.
„Во конкретниот случај врз синот, кој поради сите тие околности во својот пубертетски период за кој знаеме дека е најчувствителен во растењето и созревањето на човечкото битие, станува конфузен , интровертен, станува суицидален и сосема дезориентиран во средината“, вели актерот Амар Селимовиќ.
„Статистиката во БиХ покажува дека во последните десетина години од 100% склопени бракови, 70% завршуваат со развод . Значи , нешто што е основна ќелија на човековото општество едноставно се гаси. И ние сакавме да истражиме зошто е тоа така“, кажа актерот Адмир Гламочак.
„Беше поедноставно од аспект на тоа што јас некогаш имав 17 години и можев од прилика да се присетам на некое мое искуство од тие години. На тој начин ми беше полесно“, вели носителот на главната улога, актерот Давор Голубовиќ.