Во рамките на фестивалот на регионалната унија на театри- РУТА, што се одржува во Драмскиот театар, вечерва се игра претставата „Нора“ на Градскиот театар од Љубљана според истоимениот текст на Хенрик Ибзен. Режијата е на македонската режисерка Нела Витошевиќ.
„„Нора“ е текст кој е логичен избор за мене, затоа што тоа е првиот феминистички текст на Ибзен, а главната хероина е симбол на женскиот отпор и женската слобода, загатнува прашања кои сакам да ги отворам и да ги обработувам“, вели режисерката Витошевиќ.
Драмското творештво на Ибзен, во конкретниов случај „Нора“ и денес е особено актуелено во промислувањето на родовите аспекти во социјален, културолошки и економски контекст. И покрај тоа што мислиме дека сме напреднале во однос на женските прашања, сепак сме се вратиле неколку чекори наназад и затоа без оглед што станува збор за текст од 19-от век, тој е актуелен и денес, смета Витошевиќ.
„Она што нам ни беше важно во претставата е да проговориме за индивидуалната слобода за тоа дека истата не може да се земе здраво за готово и дека во современ контекст е нешто кое треба константно да се освојува и константно да се бориме за неа. Исто така, психолошките процеси кои една индивидуа ги минува за да дојде до таа индивидуална слобода се нешто кое остава голем белег. И нешто што општеството во колективното несвесно го влече понатаму како бреме. Втора многу важна работа е тоа дека и по век и половина ние гледаме дека сè уште жената се стигматизира и дека жената која ги остава децата е секогаш постигматизирана во споредба со мажот, тоа е и аналитички докажано“, изјави Витошевиќ.
За Ајда Смрекар, која ја толкува улогата на Нора, соработката со Витошевиќ на оваа претстава е исклучително важна, сите карактери се филигрански извезени.
„Секогаш е подготвена за различни ставови и тоа е многу важно. Како што велат актерите ако ја почитуваме работата со ваков калибар на соработници, се надевам дека сте свесни каков талент имате тука во Македонија. И се надевам дека повторно можеме да работиме заедно“, истакна Ајда Смрекар, во улогата на Нора.
Во драматуршка смисла текстот е осовременет и виден низ призма на ликот на Нора има делови кои се додадени, но и делови кои се одземени, вели Витошевиќ. Сеќавањето на Нора е мегданот на кој се поставуваат клучните прашања.
„Среќна сум затоа што видов дека различни генерации, не само жени, туку и мажи во Словенија многу добро ја прифатија претставата. Ние тој текст го имавме и во програмата на гимназиите за матура, така што многу млади луѓе ја видоа претставата и беше прекрасно да ги гледате и да ги слушате како им се допаднало тоа, како почнаа да размислуваат во однос на мажите и жените, за тоа што значи семејството, кои се човековите права. Тоа најмногу ме радуваше од се, затоа што животот на таа претстава е полн и богат, има одзив и комуникација со публиката“, изјава Петра Погоревц, драматург.
Гостувањето на Градскиот театар од Љубљана во Драмски театар на фестивалот РУТА е второ по ред во Македонија. Првото гостување беше во рамки на Охридско лето каде што претставата беше одиграна пред преполна сала.
Нина Стефанова