Со македонска премиера на филмот „ М“, во режија на Вардан Тозија, вечерва во 21 часот , во паркот зад Младинскиот културен центар започнува 22 издание на Фестивалот на европски филм Cinedays. Поради големиот интерес кај публиката, закажана е и втора проекција на филмот од 21 часот и 30 минути во киното Фросина, кое е климатизирано, велат организаторите.
Ова фестивалско издание донесува 40 филмови и 50 гости, а проекциите ќе бидат во паркот зад МКЦ, киното Фросина и во летното кино на Кинотеката на Македонија. Мото на фестивалот е „ Филмска вечер“
- Во компактната програма ќе погледнеме наслови на Вим Вендерс, Кен Лоуч, Нани Морети, Аки Каурисмаки, Франсоа Озон, Александар Сокуров…, потоа новиот филм на Горан Столевски, а имаме и премиери на пет македонски кратки филмови , кажа Маргарита Арсова, програмска координаторка на фестивалот.
Во музичката програма ќе настапат „Културно-уметнички работници“, Педро Кастиљо и белградскиот експериментален бенд „Визељ“. А, „ Cinedays“ ќе се затвори на 18 јули со уште една македонска премиера- на филмот „ Бизнисот на задоволството“, во режија на Гоце Цветановски.