Петти ден протест на синдикалните организации на администрацијата во културата. Учесниците испратија апел министерот за финансии да го одобри Колективниот договор за вработените во Министерството за култура, Управата за културно наследство и Агенцијата за филм, со кој сите вработени по принципот на Министерството за финансии, ќе добијат зголемена плата во износ од 30 проценти. По неуспешните обиди за средба со Бесими, тие решија својот револт да го изразат пред Влада.
„Епилогот од досегашните протести е отсуството на дијалог со министерот за финансии кој не наоѓа време да ги слушне нашите барања и затоа јавно сакаме да го потсетиме на неговата мисија како министер за финансии експлицитно изразена на веб локацијата на министерството која вели дека Министерството за финансии преку успешно управување со јавните финансии треба да го подобри квалитетот на живеење на граѓаните на државата. Доколку некој заборавил ова треба да се однесува на сите граѓани на државата, а не само на своите вработени“, изјави Бранко Костовски, претседател на Синдикалната организација при Министерството за култура.
„Не бараме ништо повеќе од она што го заслужуваме во Министерството за култура се сервисира работата на 68 национални установи од областа на културата 49 локални установи. На годишно ниво во рамките на конкурсите пристигаат повеќе од 5.000 апликации, барем половина од нив се поддржани. Ние склучуваме договори со корисниците, ги следиме. Значи обемот на работа е огромен“, изјава Ирина Димовска, член на извршниот одбор при синдикалната организација на Министерство на култура.