Турскиот претседател Реџеп Таип Ердоган изјави дека минатонеделните земјотреси биле со „јачина на атомски бомби“, а новите податоци покажуваат дека бројот на загинати во Турција и во Сирија надмина 41.000. Тој, исто така, истакна дека стотина илјади згради, ширум Турција, не можат да се користат, додавајќи дека секоја земја би се соочила со такви последици, како и неговата, во случај на таква катастрофа.
Но, во градот Ерзин, среде тешко погодената провинција Хатај, не е регистриран ниту еден смртен случај, а нема значителни оштетувања на ниту една зграда. Оштетени се само некои семејни куќи и неколку минариња во градот со 42.000 жители.
„Немаме урнатини, жртви или повредени поради земјотресот“, вели градоначалникот Океш Елмасоглу, изразувајќи сочувство до сите кои се погодени со потресот.
Причината зошто, во градот со кој раководи, нема урнати згради, ниту смртни случаи, според него, е затоа што никогаш не дозволил бесправно градење.
„Не дозволував бесправно градење во која било смисла. И покрај тоа, имаше обидо од некои и, иако на почетокот не можевме да ги следиме, бидејќи немавме доволно персонал, подоцна ги пријавивме кај обвинителот и објектите беа урнати“, пренесува „Хуриет Дејли“.
Тој додава дека најголем дел од зградите се со релативно ниска градба. Станува збор, како што рече Елмасоглу, самостојни градби, најчесто четирикатници и вели дека во Турција треба да настапи целосна промена во размислувањето за градежништво.
„Затоа граѓаните не треба да очекуваат никакви отстапки од државата за бесправни градби, да не посегнуваат за такви работи и да преземаат одлучни чекори за уривање на такви објекти, кога е потребно“, вели градоначалникот на Ерзин.