Започнува процесот на изработка на Стратегија за развој на туризмот 2027-2032 година, дополнета со Акциски план за спроведување, за периодот 2027-2029 година. Ќе се прави во услови кога Македонија има огромен, но недоволно искористен туристички потенцијал, кажа на денешната дебата, министерот за култура и туризам, Љутков. Според него ,документот треба да даде одговори и решенија на повеќе прашања.
- Рамномерен регионален развој на туризмот низ целата држава, ефективен дестинациски менаџмент на локално и на национално ниво, одржлив туризам кој ги штити природните и културните ресурси, дигитализација на услугите и промоција на македонскиот туризам, развој на нови, високовредносни производи во културниот, езерскиот, планинскиот, руралниот, винскиот и искуствениот туризам, подобрување на квалитетот на услугите и човечките ресурси во секторот, кажа Зоран Љутков, министер за култура и туризам.
- Одржливиот туризам не е само добар за животната средина. Тој носи реални, опипливи придобивки за локалните заедници. Отвора работни места во пооддалечените области и им нуди на младите луѓе кариера, каква што сѐ повеќе посакуваат. Флексибилна, креативна и тесно поврзана со природата, рече Кристоф Зомер, амбасадор на Швајцарија во Македонија.
- Успешна Стратегија не се создава зад затворени врати. Таа се создава преку дијалог, консултации и активно учество на сите засегнати страни: туристички бизниси, јавните институции, локалните заедници, невладиниот сектор, научната јавност и граѓаните, вели Акан Махмут, Национален координатор за туризам во Владата на Македонија.
© 2020 Телевизија Телма. Сите права се задржани.
Овој текст не смее да се печати или емитува, во целина или во делови, без договор со Телевизија Телма.