Во Благоевград транспаренти „Македонија е бугарска“

Бугарскиот европратеник Ангел Џамбаски, кој е познат по провокациите и навредите кон Македонија, вчера побара од жителите на Благоевград да излезат на протест поради отворањето на македонскиот културен центар „Никола Вапцаров“.

Џамбаски, кој е потпретседател на партијата ВМРО-БНД на Красимир Каракачанов, на Фејсбук објави фотографии од надвозници во близина на Благоевград, на кои неговите активисти поставиле транспаренти со натпис „Македонија е бугарска“.

• Станува збор за тешка провокација организирана од Скопје, бидејќи тие страшно згрешија додека ги напаѓаа бугарските клубови во Битола и Охрид. Протестираме против собирот на активни македонски политичари со сепаратистите во Бугарија. Луѓето кои стојат зад овој клуб велат дека Бугарија е окупатор во Пиринска Македонија, дека Благоевград е македонски, изјави Ангел Џамбаски по повод отворањето на македонскиот културен центар „Никола Вапцаров“ во Благоевград.

Според Џамбазки, „државата С. Македонија и лидерот на нејзината опозиција ги поддржуваат сепаратистите“.

• Ова е апсолутно кршење на Договорот за добрососедство и секоја форма на добрососедство и добри односи меѓу земјите“, додаде тој.