Со полициско обезбедување, во Благоевград се отвори македонскиот културен клуб „Никола Вапцаров“ кој според организаторите треба да ги надмине разликите, а не да ја зголемува омразата меѓу македонскиот и бугарскиот народ. Побараа можност да се самоопределуваат како Македонци во Бугарија и за тоа да не трпат навреди.
Но, вербален инцидент се случи денеска во Благоевград меѓу лидерот на ВМРО-ДПМНЕ Христијан Мицкоски и граѓанин кој носеше звучник од кој одекнуваа патриотски песни.
Инцидентот се случи по отворањето на клубот кога гостите и домаќините се упатија кон споменикот на таткото на Гоце Делчев.
Нарекувајќи го Мицкоски предавник, граѓанинот побара од него да зборува бугарски по што насобраните граѓани почнаа да извикуваат „Македонија, Македонија“.
Денешното отворање на клубот се одржува со засилено полициско обезбедување и голем медиумски интерес.