„Охридско лето“ е потврда за нашиот идентитет и потврда дека сме дел од европската култура, а другото е лага, рече министерката за култура Бисера Костадиновска- Стојчевска синоќа пред присутните во Античкиот театар, на отворањето на 62 фестивалско издание. Според министерката, од нас зависи дали ќе го надградиме идентитетот.
- Во нашето минато нема ништо од што би се срамеле за да мораме да го вртиме погледот од него. Од нашиот јазик, и нашата музика, и нашите слики, и нашите книги , и нашите ора и нашите куќи, и нашата кујна , сè е идентитет.И тоа што сме Македонци е идентитет. Идентитет што го наследивме, а од нас зависи дали ќе го надградиме, ќе го носиме во срцето или само ќе го вртиме по потреба низ уста, изјави министерката за култура Бисера Костадоновска- Стојчевска.
Покровителот на „ Охридско лето“, претседателот Пендаровски, пред да го прогласи фестивалот за отворен, цитирајќи го Франц Кафка кажа дека од уметност на живеење преминавме на уметност на преживување поради изместените вредности и губењето на моралот.
- Сите уметности и служат на најголемата уметност- уметноста на живеење на земјата. За жал сведочиме дека во епхата на информациско-технолошки и научен развој, без преседан, наместо луѓето да бидат посигурни и посреќни, живеењето на многу места во светот се претвора во борба за власт, доминација над другите и опседнатост со материјалното. Сведоци сме на воени конфликти, глобални здравствени закани, непочитување на човековите права и слободи. Понишување на достоинството, тектонско изместување на вредностите и губење на моралниот компас, порача претседателот Пендаровски.
Фестивалот започна со концерт на докажаните четири италијански тенори. Тие изведоа арии и популарна класична музика, во придружба на оркестарот на нашата Национална опера и балет, под диригентство на маестро Лоренцо Бицари.
Сотир Трајков