Украинскиот претседател Володимир Зеленски синоќа изјави дека е скептичен во врска со ветувањето на Русија за намалување на воените активности во близина на Киев и Чернихив.
„Се разбира, гледаме ризици. Се разбира, не гледаме основа да веруваме во зборовите на претставник на држава која продолжува да се бори за наше уништување. Украинците не се наивни луѓе. Украинците веќе научија во текот на 34-те дена од инвазијата и во текот на изминатите осум години од војната во Донбас дека може да се верува само на конкретни резултати“, рече Зеленски.
Украинскиот лидер ги повика Украинците да останат внимателни и покрај тоа што изјави дека сигналите од мировните преговори со Русија работеле позитивно.
„Ситуацијата не стана полесна. Размерите на предизвикот не се намалија. Руската армија сè уште има значителен потенцијал да го продолжи нападот врз нашата земја. Тие сè уште имаат многу опрема и доволно луѓе да испратат во војна“, додаде тој.
Зеленски рече дека Украина нема да ги намали своите одбранбени напори:
„Непријателот се уште е на наша територија. Гранатирањето на нашите градови продолжува. Мариупол е блокиран. Ракетните и воздушните напади не престануваат. Ова е реалноста. Ова се фактите. Да, сигналите што ги слушаме од преговарачката платформа може да се наречат позитивни. Но, тие сигнали не ја замолчуваат експлозијата на руските гранати“, истакна Зеленски.