Цената на дизел горивото од ноќеска на полноќ се зголемува за 8,5 денари за литар, а бензините поскапуваат за 3,5 денари, одлучи доцна вечерва Регулаторната комисија за енергетика и водни услуги (РКЕ). Со оваа одлука се врши зголемување на малопродажните цени на нафтените деривати во просек за 6,88 отсто.
Новата малопродажна цена
ЕУРОСУПЕР БС-95 е 93 денари за литар, ЕУРОСУПЕР БС-98 е 95 денари за литар ЕУРОДИЗЕЛ (Д-Е V) е 94 денари за литар.
Со одлуката на РКЕ за 6,50 денари за литар се зголемува малопродажната цена на Екстра лесното масло за домаќинство (ЕЛ-1) и ќе изнесува 90 денари. Мазутот М-1 НС, пак, поскапува за 4,846 денари за килограм и ќе се продава за 59,165 денари.
Како причина за зголемувањето на малопродажните цени на нафтените деривати од РКЕ ги посочуваат зголемените референтни цени на нафтените деривати на светскиот пазар кај бензинот во просек за 8,971 отсто и кај дизелот за 16,811 отсто, како и за околу 1,078 отсто повисокиот курс на доларот во однос на денарот.
Со најновата одлука, намалена е и маржата за трговците со нафтени деривати. Намалувањето на маржата е 33% или една третина од досегашната вредност со што дополнително ќе се отежне работењето на трговците со деривати и на бензинските пумпи особено во делот на надминување на трошоците за оперативно тековно работење и функционирање на пазарот.
.Дополнително олеснување врз притисокот на крајната цена ќе бидат и најавените измени во делот на ДДВ и акциза, кои апелираме побрзо да се донесат, изјави претседателот на РКЕ Марко Бислимоски.
Иако владата и економскиот тим на Ковачевски денеска соопштија дека како мерка ќе следува намалување на акцизите и на ДДВ за дериватите тоа не се случи бидејќи, според премиерот, тие измеби треба да поминат на Собрание.