На актуелниот претседавач со ОБСЕ, Полска и минатогодишниот Шведска, од денеска им се придружи и Македонија. Заедно ќе го сочинуваат триото претседавачи, познато како ОБСЕ тројка. Со ова и формално почнаа нашите обврски во пресрет на претседавањето идната година со најголемата регионална безбедносна организација во која членуваат 57 земји, плус 11 медитерански и азиски земји партнери.
Македонија го презема претседавањето со Групата на медитерански партнери – Алжир, Египет, Израел, Јордан, Мароко и Тунис. Ќе ја организира и Медитеранската конференција, а потоа го презема и управувањето со донесувањето на буџетот на Организацијата. Целосното преземање на претседателството ќе биде во 2023 година.
Во меѓувреме, во мисијата во Виена треба да се упатат 15 дипломати, но Министерството има проблем со нивниот избор. Според сегашниот закон, за еден дипломат повторно да замине на мисија треба од завршувањето на претходната, да има престој од 24 месеци во МНР.
Државата веќе ги утврдува приоритетите за претседавањето, кои треба да ги претстави во мај. Прво се прават внатрешни консултации со нашите министерства, а во првите шест месеци Османи ќе ги посети неколкуте земји учеснички за да ги чуе нивните очекувања. За реализација на активностите кои произлегуваат од претседавањето со ОБСЕ, веќе е предвиден и буџет од 110 милиони денари, или 1.800.000 евра.
Далиборка Дамјанска Цветановска