Екипата на Телма, новинарот Миомир Серафиновиќ и снимателот Игор Јанковски и денеска ги пренесуваат најновите информации од Бугарија по ужасната автобуска несреќа, во која животот го загубија 45 луѓе.
Едно сведочење кое го пренесуваат е од градежен работник кој бил на околу 500-тини метри од местото каде се случи несреќата. Тој со уште еден колега пристапиле до автобусот каде слушнале ужасни повици од луѓето во автобусот а ги забележале и луѓето кои успеале да избегаат од страотниот пожар во автобусот.
Иако сакале да им помогнат на патниците, тие сепак не можеле заради силниот оган.
Се уште не е дозволен пристап до местото на трагичната несреќа од страна на бугарската полиција, заради истражните активности кои се уште се во тек.
Нашиот репортер известува и за здравствената состојба на преживеаните патници, кои се сместени во болницата “Пирогов”. Според изјавите на лекарите, сите 7 преживеани патници се во стабилна здравствена состојба. Само еден од нив има повреда на р’бетот, заради која може да му биде извршена хируршка интервенција.
Пред болницата и денеска се присутни повеќе роднини на патниците кои ја преживеаја несреќата и сакаа да ги видат своите најблиски.
Дел од нив се уште се во шок од преживеаното и се под посебна нега од здравствените работници во бугарската болница.