Атмосферското загадување е водечка еколошка закана за здравјето на луѓето во Европа, а нивоата на повеќето земји од ЕУ сè уште се над препорачаните граници на загадување.
Предвремените смртни случаи предизвикани од загадувањето на воздухот со ситни честички се намалуваат за 10 отсто годишно низ Европа, но невидливиот убиец сè уште предизвикува 307.000 предвремени смртни случаи годишно.
Бројките беа објавени од Европската агенција за животна средина.
Доколку членките на ЕУ ги следат најновите упатства за квалитетот на воздухот од Светската здравствена организација, последниот број на смртни случаи регистрирани во 2019 година би можел да се преполови, објави ЕЕА.
Дури и ако ситуацијата се подобрува, ЕЕА во септември предупреди дека повеќето земји на ЕУ сè уште се над препорачаните граници за загадување, без разлика дали се европски упатства или поамбициозни цели на СЗО.
Според здравственото тело на ОН, загадениот воздух предизвикува седум милиони предвремени смртни случаи годишно низ целиот свет, на исто ниво како пушењето и лошата исхрана.
Според ЕЕА, загадувањето на воздухот останува најголемата еколошка закана за здравјето на луѓето во Европа.
Срцевите болести и мозочните удари предизвикуваат најголем дел од предвремените смртни случаи за кои се обвинува загадувањето на воздухот, а потоа и белодробните заболувања, вклучително и ракот.
Кај децата, атмосферското загадување може да му наштети на развојот на белите дробови, да предизвика респираторни инфекции и да ја влоши астмата.
„Инвестирањето во почисто греење, мобилност, земјоделство и индустрија го подобрува здравјето, продуктивноста и квалитетот на животот за сите Европејци, а особено за најранливите“, рече директорот на ЕЕА Ханс Бруининк.
ЕУ сака да ги намали предвремените смртни случаи поради загадувањето на воздухот за најмалку 55 отсто во 2030 година во споредба со 2005 година.
Доколку загадувањето на воздухот продолжи да опаѓа со сегашната стапка, агенцијата проценува дека целта ќе биде постигната до 2032 година.
Сепак, стареењето и сè поурбанизираното население може да го отежне тоа.
„Постарата популација е почувствителна на загадувањето на воздухот и повисока стапка на урбанизација обично значи дека повеќе луѓе се изложени на концентрации на ПМ 2,5, кои имаат тенденција да бидат повисоки во градовите“, се вели во извештајот.