Без метеж и турканици помина првото утро откако на сила стапи мерката која надлежните ја донесоа наменски, за да се поттикне процентот на вакцинирано население.
Оние кои досега не се одлучиле да примат прва или втора доза од вакцините против Ковид-19, ниту денес не побрзаа да го сторат тоа иако веќе се засилија ограничувањата.
Без сертификат како доказ за примени две дози вакцина, односно комплетна имунизација, не може да се влезе на затворено – во барови, ноќни клубови, дискотеки, угостителските објекти за свадби, родендени, крштевки и слично, ниту пак на концерти, семинари, обуки, курсеви, работилници и други културни и спортски настани.
Оваа одлука Владата ја донесе пред точно 21 ден, а се остави простор на граѓаните кои немаат примено вакцина, да имаат време да го направат тоа.
Инаку, показател дека драстично е намален интересот за вакцинација се извештаите на Здравство каде што има секојдневен пораст на бројките на вакцинирани со трета доза, но загрижувачки ниски бројки на граѓани кои за првпат се имунизрале.
Сега вкупната бројка на граѓани со три дози е 54.170.
Освен на вакциналните пунктови, очекувано, немаше метеж ниту во угостителските објекти.
Заради непочитување на мерките и протоколите, угостителите можат да се соочат и со вакво известување залепено на влезните врати, а потоа и со казна.
Петар Догов