ВМРО-ДПМНЕ по вториот изборен круг ќе отпочне со преговори за ново парламентарно мнозинство. Ќе водат разговори со малите политички партии кои се дел од владејачката коалиција. Лидерот на партијата Христијан Мицкоски вели дека успехот од изборните резултати отвора врата за промена на власта, а ова е голем чекор до финална победа.
Лидерот на СДСМ Зоран Заев синоќа му порача на Мицкоски да не се надева, затоа што парламентарното мнозинство ќе се окрупнува.
Окрупнување на опозицијата најавија и од Левица кои на овие локални избори добија резултат кој е за 15 пати подобар од минатите локални избори и четири пати подобар од парламентарните, освојувајќи советници во 30 општини.
Принципиелен став е дека не коалицираме предизборно со никого, а постизборно може да преговараме. Во игра е и формирање ново парламентарно мнозинство, чекаме покана за преговори, велат од Левица.
Познавачите на состојбите сметаат дека во моментов моќта на ВМРО-ДПМНЕ е поголема наспроти СДСМ.
Малите партии кои се дел од владејачкото мнозинство се воздржуваат од каков било коментар за идејата за формирање ново парламентарно мнозинство.
Јулијана Пешевска