Во саботата, на последниот предизборен ден, во Амбасадата на САД стигнало предупредување од припадник на една политичка партија дека во изборите се вклучени вооружени, и за изборно насилство подготвени, луѓе кои претходно имале кривично досие. Партиската дојава, од амбасадата, во 9 часот денеска е препратена до обвинителството, кое почнало проверка со полицијата.
Добиено е известување од страна на Оперативниот штаб, доставено од страна на Амбасада на САД во кое известуваат дека едно лице од политичка партија, на 16.10.2021 година се обратило до нив и споделило информација дека 83 лица кои биле повеќекратно осудени сторители на кривични дела и се на слобода, добиле огнено оружје со цел попречување на изборниот процес, како и дека друго лице – познат сторител на кривични дела поседува оружје и дека на денот на гласањето ќе изврши кривични дела со кои ќе го загрози животот и телото на лица – членови на политичка партија, соопштуваат од обвинителството.
Полициските проверки не откриле ниту десетина вооружени криминалци ниту обиди за политичка ликвидација, како што била пријавата во американската амбасада.
Преземени се сите потребни мерки и активности во координација со Агенцијата за разузнавање (АР) и Агенцијата за национална безбедност (АНБ) и до сега нема никаква потврда на изнесеното. Апелираме до граѓаните да не се вознемируваат и слободно да го искористат гласачкото право. МВР ги презема сите мерки да ја гарантира безбедноста и зачувувањето на јавниот ред и мир, порачуваат од мвр.
Од МВР кратко соопштија дека пријавата е поднесена од припадник на една политичка партија, но полициските служби ќе обезбедат мирен изборен ден.
Миомир Серафиновиќ
