Ќе помогнат ли безбедносните камери поставени околу Модуларната болница во Прилеп, да се расветли инцидентот, кој за среќа мина без последици.
Во овој објект каде се сместени 17 ковид пациенти, е оштетена електричната табла и насилно отворена со хебла, а случајот веќе го истражува полицијата.
Опремата во модуларната болница не останала без напојување, затоа што не се снабдува со струја од оваа табла, па животот на пациентите не е загрозен.
Од прилепската болница велат дека не се знае кога се случи овој вандалски чин, но обезбедувањето го откри синоќа кога вратата од таблата случајно се отвори од силниот ветер. Електричната инсталација во Модуларната болница нема никакво оштетување.
„Општа болница Прилеп до Министерството за внатрешни работи синоќа пријави случај на физичко оштетување на таблата за електрична енергија од модуларната болница. Обезбедувањето на болницата забележило дека таблата од надворешната страна на болницата е отворена со хебла и го известиле електричарот од болницата, а веднаш била повикана и полиција. Струјата во модуларната болница е во функција, бидејќи надворешната табла не врши дотур на електрична енергија на опремата во болницата Во модуларната болница има хоспитализирано 17 пациенти, вандализмот не довел да се загрози животот на пациентите“, се наведува во соопштението од Министерството за здравство.
Од 17 пациенти во Модуларната болница во Прилеп, 14 се на кислородна поддршка, а 2 се со тешка клиничка слика. Министерството за здравство апелира до надлежните институции за што побрзо расчистување на инцидентото во Прилеп. Снимките од безбеносните камери веќе се подигнати од истражните органи.
Емилија Мисирлиевска