Првпат среде пандемија со стриктни мерки за собирање, првпат растурен со полициски сили. Вевчанскиот карневал и оваа година дигна многу прав. Оригиналните маски поради групирање беа остранети и разделувани од немаскирани полицајци и во сини и во маскирни униформи на ЕБР. Имаше многу полициски сили што предизвика тензии кај населението, вели градоначалникот на Вевчани Сашо Јанкоски и тврди дека инцидентот не бил голем и сериозен, а едниот приведен бил ослободен со интервенции од општината.
Зошто толку полиција во Вевчани, зошто многумина од полицајците не носеа маски и дали имало пречекорување на полициските овластувања бидејќи се гледа на снимки туркање. На овие прашања од МВР одговорија дека се расчистува случајот во Вевчани.
Полициските службеници интервенираа поради непочитувањето на мерките и прописите за спречување на ширење на коронавирусот односно забраната за групирање на повеќе од четири лица со што се загрозува здравјето на граѓаните во услови на глобална пандемија. Меѓу другото, се анализираат снимките, но и други активности за целосно расчистување на случајот, по што ќе следуваат соодветни поднесоци.
Од Хелсиншкиот комитет разгледуваат две снимки на кои се гледа дел од инцидентот и бараат сите граѓани кои имале проблеми да се пријават за да се утврдува евентуална одговорност за пречекорување на полициските овластувања. Досега нема пријава од граѓанин. Градоначалникот кој денеска беше на последниот карневалски ден кога василичарите ги палат маските повика Свети Василиј и карневалот да се остават надвор од политичките игри.
Општината ги откажа сите свои активности на карневалот бидејќи Вевчани беше сериозно погоедно од короната, но сепак и во ова време маските беа изработени, прошетани и на крај предупредувани и растерувани на растојание од големи полициски сили.
Миомир Серафиновиќ