Прва задача на новиот Извршен комитет на ВМРО-ДПМНЕ беа кадровските промени во партијата. Тимчо Муцунски и Влатко Ѓорчев се именувани за меѓународни секретари, Владимир Нелоски за претседател на градскиот комитет Скопје а Иванка Василевска е назначена за координатор на централните комисии. Распишан е оглас и за избор на нови претседатели на 15 општински комитети.
Од партијата велат дека кадровските освежувања и доекипирања ќе продолжат и во периодот кој следи со цел да се урне актуелната власт.
За СДСМ со кадровските промени наместо демократизација, лидерот на партијата Мицкоски спроведува милитаризација на ВМРО-ДПМНЕ. Како неетички и демократски преседан го оценија именувањето на полковникот Драган Ковачки за член на Извршниот комитет.
И покрај неприфаќањето на предлогот за свикување вонреден конгрес, иницијативниот одбор за промени најави дека деновиве ќе го мобилизира членството и ќе побара конгресот да се свика најдоцна до крајот на годината.
Јулијана Пешевска