Стотици згрижувачки и друг персонал од приватните градинки ќе остане без работа, илјадници деца ќе бидат незгрижени, а приватните градинки затворени ако државата не помогне – алармираат од Асоцијацијата на приватни установи за деца „ПОЛЕТ“.
Пандемијата ги погоди речиси сите бизниси, но според членовите на Асоцијацијата, Владата различно ги третира државните и приватните установи за згрижување деца иако тие реализираат иста дејност и одговараат пред ист Закон.
Станува збор за триесетина градинки на кои им се заканува затворање.
„Тоа е огромна бројка на приватни установи. Во нив се згрижени околу 1300 деца и вработени се околу 600 лица. Единствено нешто што не сите од приватните градинки успеаја да искористат периодов е мерката за субвенционирање на платите. Другите економски мерки и пакети коишто беа насочени кон приватниот сектор, никој од приватните градинки не успеа да ги реализира“ изјави Елена Кливановска, потпретседател на Асоцијацијата на приватни установи за деца „ПОЛЕТ“.
За датум за отворање на градинките се чека официјална одлука од Министерството за труд и социјална политика, а Комисијата за заштита од заразни болести пред десетина дена одобри тие да започнат со работа.
Во меѓувреме, од ресорот под чијашто капа се установите за згрижување на деца, за Телма кажаа тие немаат надлежност да носат одлуки за субенционирање на плати туку Владата утврдува кои категории на лица и правни субјекти ќе добијат финансиска помош и поддршка за своето работење.
„Дел од барањата беа во насока на помош и поддршка на приватните градинки преку субвенционирање на платите на вработените за месеците јули и август, за што од наша страна им беше укажано дека за тоа прашање како Министерство немаме надлежност. За месеците мај и јуни приватните градинки кои се дел од Асоцијацијата Полет, имат добиено поддршка и помош од Владата за субвенционирање на платите на вработените“ велат од Министерството за труд и социјална политика.
Во меѓувреме, се очекува одлуката на надлежните и околу новата учебна година, којашто е на само три недели од почетокот.
Извори од Министерството за образование и наука за Телма брифираат дека денес на седница на Влада повторно се разгледувале моделите за спроведување на наставата од септември.
Комисијата за заштита од заразни болести ќе се состане утре и на седницата повторно ќе се анализираат протоколите и можноста за спроведување на истите во училиштата од септември.
Едно од разгледуваните опции од страна на Комисијата е првачињата и децата од другите пониски одделенија да одат на училиште, а повозрасните да учат онлајн.
Петар Догов