Убиецот Вук Бориловиќ, масакрот го извршил по расправија со семејство кое живеело кај него како потстанари, откако претходно настанала кавга за нерасчистени сметки и доцнење со исплаќањето на киријата, објавува „Телеграф.рс“,. Ваквите информации за нив ги дал извор близок до семејството.
Според изворот на Телеграф, Бориловиќ извршил притисок врз жената која била потстанар, а таа потоа му се пожалила на сопругот, кој бил на пат. Сопругот повикал пријател кој отишол кај Бориловиќ и оттука започнала расправијата. Потоа Бориловиќ прво го убил пријателот на семејството кое живеело со него, а потоа и останатите.
Престрелката се случила околу 16:00 часот, а според информациите вооруженото лице пред да биде убиено ја попречувало брзата помош да дојде до повредените.
Во масакрот во Цетиње според неофицијални информации настрадаа 11 лица, меѓу нив и деца а повредени се најмалку 6, од кои три се потешко повредени и се наоѓаат во Општата болница Цетиње. Тие се на одделот за хирургија и лекарите се борат за нивните животи.
Се стравува дека број на жртви може да биде уште поголем со оглед дека во Клиничкиот центар на Црна Гора се испратени неколку возила на брза помош со повредени. Меѓу ранетите е и еден полициски службеник.
„Се случи трагедија што Црна Гора не ја памети. Ги повикувам сите граѓани на Црна Гора да бидат со семејствата на невините жртви, нивните роднини, пријатели и сите граѓани на главниот град Цетиње“, напиша на Телеграм црногорскиот премиер Дритан Абазовиќ.
Според засега непотврдени информации, кои исто така ги објави Телеграф, Бориловиќ наводно се лекувал во психијатриска установа од која неодамна бил пуштен.
Делот од градот во Цетиње каде се случи масакрот е блокиран, а на местото се собраа голем број граѓани. Во земјата прогласена е тридневна жалост.