По силното невреме кое вчера ја зафати нашата земја од денеска ќе започне проценка на штетата. Најпогодени беа Полог, Пелагонија, Велешко, Светиниколско, Скопско и Кумановско. Од поплавените улици водата навлезе и во подрумите на куќите и зградите, силниот ветер уриваше и дрвја. Струмица јавува дека големи штети има на посевите на отворено, најмногу настрадал бостанот. Тука наврнал и најмногу дожд – 43 литри на метар квадратен.
И овошните насади во Преспа не беа поштедени. Дождот проследен со град направил и тука сериозни штети. Во Тетово, исто така поројниот дожд буквално направи мали езера на улиците, навлезе и во подрумите на куќите и зградите, а поплавена е и тетовската уметничка галерија.
Градоначалникот Касами рече дека лошите инвестиции во атмосферската канализација во Тетово го дале својот резултат, и најави дека за штетите кои допрва ќе се проценуваат ќе бара помош од владата.
