Македонската претставничка на Евровизија, Андреа Коевска го фрли македонското знаме при фотографирањето на тиркизниот тепих.
Ваквото однесување на евровизиската претставничка предизвика гнев кај граѓаните, кои бараат нејзино повлекување од Евровизија.
По скандалот, се огласија и од Македонската радио телевизија, кои го осудија овој гест и ја разгледуваат можноста за нејзино повлекување од музичкиот настан.
„Македонската Радио Телевизија најостро го осудува потегот на нашата претставничка на „Песна за Евровизија 2022“, Андреа Коевска којашто за време на фотографирањето во Торино го фрли на земја државното знаме.
Јавниот сервис на ниту еден начин не стои зад ваквото скандалозно однесување на нашата евровизиска претставничка, која со тој гест покажа непочитување кон националното обележје, што е казниво со закон.
МРТ очекува од Андреа да им се извини на граѓаните за ваквото однесување. Јавниот сервис ја разгледува можноста за нејзино повлекување од Евровизија, иако ќе се води сметка да не се предизвика поголема штета по МРТ.
Против одговорните во македонската делегација ќе бидат преземени сите законски можности за најстрого санкционирање за овој скандал“, велат од МРТ.
Според Член 8 – Грбот и знамето на Република Македонија, како и грбовите и знамињата на други држави и меѓународни организации кои се употребуваат во Република Македонија согласно со одредбите на овој закон, не смеат намерно да се кинат, палат, газат или на друг начин да се скрнават или изложуваат на презир или исмејување.
