По шест месеци од преземање на функцијата, Уставниот судија Гоце Наумовски поднесе неотповиклива оставка, дознава Телма.
Оставката е депонирана во Собранието. Од Кабинетот на претседателот на Собранието Гаши потврдија дека оставката е примена и архивирана и доставена до спикерот. Во оставката е наведено дека Наумовски ја напушта функцијата поради лични и професионални причини.
Гоце Наумовски беше избран за Уставен судија во февруари годинава по предлог на Собранието.
Наумовски е професор на катедрата по римско право на правниот факултет „Јустинијан Први“ , пред изборот беше надворешен советник на премиерот и е брат на поранешниот вицепремиер за европски прашања Васко Наумовски. Тој беше предложен за Уставен судија од владеачкото мнозинство.
Уставниот суд дознал за оставката на Наумовски, од претседеталот на Собранието.
„До Судот, од страна на судијата Гоце Наумовски не е доставена официјална информација дека поднесува оставка. Судијата денеска беше отсутен од седницата. Официјална потврда не е пристигната ниту од Собранието. Претседателот Костадиновски единствено доби потврда за оставката во телефонски разговор од претседателот на Собранието, Африм Гаши“, соопштија од Уставен суд.