Во специјално изграден бункер во минибус, најдени се 500.000 евра спакувани во 14 проѕирни ќеси. Парите биле откриени на граничниот премин Табановце.
Автобусoт бил сопственост на туристичка агенција од Албанија.
„ Девизите и возилото се трајно одземени, а сторителот, државјанин на Албанија, со иницијали Џ. Г., кој управувал со минибусот, е соодветно гонет, за што веќе е изречена судска пресуда од Основниот суд во Куманово.
Обидот е откриен во акција на Одделението за оперативни работи на влез на државниот граничен премин Табановце, во која е извршена детална контрола на минибусот, сопственост на туристичка агенција од Албанија со која биле превезувани седум патници“, рече директорот на Царинската управа Бобан Николовски.
Криумчарените пари прво ги надушкало царинското куче, по што автобусот бил скениран од Службата за мобилни скенери.
По отстранување на преправениот дел од возилото, инспекторите пронашле 500.000 евра во кеш, скриени во специјално конструираниот простор.
Запленетите средства ќе се депонираат во Народната банка.
Николовски најави дека цариниците кои ја откриле пратката ќе бидат наградени со по 10.000 денари.