Државната изборна комисија продолжува да работи со ист состав, но со нов претседател. За оваа функција, која ѝ припаѓа на најголемата опозициска партија, СДСМ го предложи, а Комисијата за избори и именувања го избра поранешниот вицепремиер за евроинтеграции, Бојан Маричиќ. Актуелниот претседател, Борис Кондарко, ќе биде член на Комисијата.
Од СДСМ беа пријавени и екс-заменичката во Правда, Викторија Аврамовска Мадиќ, Марија Митановска Димовска, дипломиран правник од Скопје и Даниела Маркоска, дипломиран правник од Скопје.
ВМРО-ДПМНЕ ги задржа досегашните членови, Александар Даштевски, Светлана Карапетрова и Ангелчо Ристов. Нема промени ниту кај ДУИ кои повторно ја предложија Дитмире Шеху, ниту, пак, кај Движење Беса, кои повторно ќе бидат претставени од Абдуш Демири,кој ќе биде и потпретседател на ДИК.
Ново-старите членови беа избрани едногласно, без забелешки и дискусија. Оваа комисија брои седум члена. За овие функции беа пријавени 16 кандидати, повеќето правници, но и инженер по електротехника и дефектолог.
Далиборка Демјанска Цветановска
Дигитална обработка: T.Д.