Вработените на археолошкиот локалитет Стоби и во Универзална сала сѐ уште не ги добиле платите за мај, а од јули нема да имаат ни здравствено осигурување, алармираат од Синдикатот за култура на Македонија. Од таму велат дека се работи за установи чии Управни одбори одлучиле да ги одбијат наложените пресметки за плати од министерствата за култура и туризам и за финансии, дадени на 22 април. Од СКРМ се разочарани од ресорот Култура, кој според нив врши притисок врз директорите на овие установи да направат пресметки кои се спротивни на законот и Колективниот договор.
„Во моментов се принудуваат директорите да направат пресметка на плата која што нема да соодветствува со одлуката на Управниот одбор. Што значи дека, директирите се доведуваат со ситуација на овие две институции, значи Стоби и Универзална сала, да направат пресметка на плата спротивна на одлуката, иако знаеме дека по закон директорот е должен да спроведува и почитува одлуки на Управен одбор“, вели Вера Атанасовска- претседателка на СКРМ.
Одлуките на управните одбори се конечни. И за секое непочитување директорите ризикуваат да добијат тужби. А, од Министерството за култура и туризам не ги споменуваат одлуките и ги притискаат директорите да постапат противзаконски, вели претседателката на Синдикатот.
„Во овој случај, Министерството за култура треба да каже јавно , дали директорите треба да ги почитуваат одлуките на Управен одбор или не“, вели Вера Атанасовска- претседателка на СКРМ.
Исплатените мајски плати во останатите 124 установи од културата се незаконски, со 3% пониски суми. Решенијата за овие и за платите за март и април кои се исти со мајските, веќе се обжалени, а до Министерството за култура и туризам се поднесени над 700 тужби за кои судот треба да одлучи, дополнува Атанасовска.
Од Министерството за култура и туризам велат дека Универзална Сала и локалитетот Стоби не доставиле соодветна пресметка на плата, согласно закон и колективен договор. Исплатата кај овие институции ќе се изврши истиот момент, кога ќе достават соодветната пресметка до Министерството за култура и туризам. А, шпекулациите за било каков притисок врз институциите, немаат никаква допирна точка со вистината, додаваат од ресорот.
Сотир Трајков