Повеќе од една деценија политичарите зборуваат за повторно отворање на граничниот премин „Маркова Нога“ во Преспа. Најавите се интензивираа по потпишувањето на Преспанскиот договор, со безброј ветувања и рокови за активирање на овој премин кон соседна Грција.
Конечно, градежните работи од македонска страна се доведени во напредна фаза, но на грчката страна преминот се уште е само зелена ливада. Иако завршувањето на проектот се очекува за две години, евроамбасадорот Михалис Рокас е претпазлив и вели дека ова е сепак Балкан.
- Задоволни сме што гледаме напредок и сакам да им се заблагодарам на сите вклучени. Исто така, сигурен сум дека и од грчка страна ќе има напредок. Полицијата од двете страни соработува и ќе го следи текот на реализацијата. Активностите се планирани да завршат до февруари 2028 година. Сепак , ова е Балкан, рече амбасадорот Рокас.
Проектот е финансиран од Европската Унија, а го спроведува УНДП, чии претставници задно со претставници на државните институции, денеска ја посетија „Маркова Нога“ за да го видат напредокот на работите. Преминот ќе располага со сообраќајница во должина од 350 метри, со четири коловозни ленти – по две во секој правец, како и со придружни објекти и инфраструктура.
- Прогресот е околу 60 проценти. Очекуваме работите да завршат до крајот на септември, согласно планираната динамика, и се надеваме дека нема да има отстапувања од роковите“, изјави Зоран Трајчевски, проектен менаџер на УНДП.
Граничниот премин „Маркова Нога“ е затворен веќе 60 години, а неговото повторно отворање се очекува да ги поттикне туристичката и трговската размена во регионот. Останува да се види дали овој проект ќе биде успешно реализиран или ќе ја доживее судбината на железничката пруга од Битола кон Грција, која е целосно изградена од македонска страна, но се уште не е ставена во функција
Емилија Мисирлиевски
Б.С.