Ограничување на цени и маржи за сега нема да има. Пред два дена трговците беа предупредени -ако не ги намалат цените на производите кои деновиве ги поскапеа , ќе се воведат поригорозни мерки. Сега, министерот за економија Дурмиши, вели дека тие се вразумиле и нема потреба од тоа. Но, повторно ги предупреди ако пак се случи истото ќе бидат казнети и нема да има опомени како сега.
- Се намалија цените на маслото јајцата, сувомеснати производи, млеко, путер грав. Ако видиме вакво однесување повторно имаме механизми и веднаш ќе донесеме одлука па ќе следат казни па дури и затворање, изјави министерот за економија и труд, Бесар Дурмиши
Граѓаните пак повторно сметаат дека промени значајни нема, намалувањата се незначителни со оглед на тоа што се случувало со цените во изминатиот период.
Овој пат кошничката не е донесена врз основа на одлука, туку Владата се потпре на ветувањето кое го дадоа трговците, производителите и дистрибутерите. Но, бргу ја изгуби довербата во нив затоа што откако ги поевтинија производите кои се дел од кошничката, другите кои не беа опфатени ги поскапеа и до 30 отсто. Па, од тука се отвара прашањето дали слендите кошнички треба да се носат на ист принцип.
- Кога ќе дојдат празниците ќе седнеме и повторно ќе разговараме за да видиме како ќе се постапува, додава Дурмиши.
Дека изминатиот период цените значително се зголемија покажува и статистиката која во ноември измери инфлација од 4, 3 отсто во споредба со истиот месец лани. Тоа го покажаа и анализите и на ССМ каде се наведува дека има скок и на месечните трошоци.
Ирена Чачкова