Со затворањето на гласачките места во Алјаска, заврши долгата изборна ноќ во САД, во која избирачите од 50 сојузни држави и шест временски зони го дадоа својот глас на изборите за Претставничкиот дом и Сенатот.
Победата на Републиканците во Конгресот е речиси извесна, додека трката за Сенатот продолжува, но се чини дека Демократите ќе ја задржат контролата, откако демократот Џон Фетерман победи во Пенсилванија, во една од трите тесни трки за Сенатот.
Според последните проекции демократите засега освојуваат 173 места, додека републиканците 194 места во Претставничкиот дом од 435 места. За контрола над Долниот дом на Конгресот неопходни се 218 пратенички места.
Досега мнозинство во Претставничкиот дом имаа Демократите, кои имаа 222 претставници наспроти 213 републиканци. Сепак, дури и во пресрет на изборите, анкетите укажуваа на безмалку сигурен пораз на демократите во борбата за Долниот дом.
Што се однесува на Сенатот, таму трката сѐ уште е неизвесна, но најверојатно деморкатите ќе го задржат мнозинството, по победата на Фетерман во Пенсилванија која им ја врати надежта. Според Би-Би-Си засега демократите имаат 48, а републиканците 47 места.
Клучната битка продолжува да се води во Џорџија помеѓу демократот Рафаел Ворнок и поранешната ѕвезда на американскиот фудбал, републиканецот Хершел Вокер.