Пожарот што вчера изби над градот Штип е целосно изгаснат, потврди градоначалникот на Општина Штип, Иван Јорданов.
Огнената стихија била ставена под контрола околу полноќ, по што екипите на Територијалната противпожарна единица останале на терен за да спречат повторно разгорување.
Во акцијата учествувале 23 пожарникари со пет возила, како и 12 доброволци од Доброволното противпожарно друштво – Штип, кои помогнале на тешко пристапниот терен.
Пожарот бил предизвикан од удар на гром на рид над викенд населбите Плуждино и Новакова Чешма.
Во пожарот изгореле сува трева и грмушки, но нема причинета материјална штета, ниту повредени лица.
Надлежните упатија благодарност до пожарникарите, доброволците, месното население и јавните претпријатија кои учествуваа во локализирањето на пожарот.